పత్రికొక్కటున్న మిత్ర కోటి..

పొద్దున్నే ఛాయ్ తాగుతూ దిన పత్రిక చదువుతుంటే.. ఆ మజాయే వేరు..

ఏదో తెలుగుకోవాలనే తపన.. ఎందుకో వెతుకులాట.. ఒక పేపర్ తర్వాత మరో పేపర్.. అప్పటికీ తనివి తీరకుంటే ఆన్ లైన్ ఎడిషన్లు ఉండనే ఉన్నాయి.. కానీ ఏటా దిన పత్రికలు మూడు, నాలుగు రోజులు సెలవు తీసుకుంటాయి.. అలవాటు కొద్దీ వీధిలోకి చూస్తాం.. కొద్ది సేపటికి గుర్తుకొస్తుంది.. ఇవాళ పేపర్ రాదు.. పునర్దర్శనం తిరిగి రేపేనని.. ఇక రోజంతా ఏదో కోల్పోయిన వెలితి.. ఈ సమస్య చాలా మందికీ ఉండొచ్చు.. కానీ నాతోటి జర్నలిస్టులకు మరింత ఎక్కువ.. టీవీ ఛానళ్లు ఎన్ని ఉన్నా దిన పత్రిక చదివితేనే తృప్తి..

అందుకే నార్ల వారు అన్నారేమో.. ‘ పత్రికొక్కటున్న పదివేల సైన్యంబు.. పత్రికొక్కటున్న మిత్ర కోటి’ అని.. నిజమే పత్రిక లేని రోజు ఒక మిత్రున్ని కలుసుకోలేని ఆదుర్దా.. అనిపిస్తూ ఉంటుంది.. అసలు పత్రికలకు సెలవులు అవసరమా? మీడియా మిత్రులకు ఎలాగూ షిప్టులు, వ్యక్తిగత వారాంతపు సెలవులు ఉండనే ఉన్నాయి.. కానీ కొట్టుకు ఆదివారపు సెలవు అన్నట్లు పత్రికలకు సెలవులేమి అని..

ఒకవేళ కార్మిక చట్టాల ప్రకారం కనీసం ఏడాదికి మూడు, నాలుగు రోజులైనా పత్రికలు సెలవులు ఇవ్వాలనుకుంటే ఒక ప్రత్యామ్నాయం ఉంది.. ఎలాగూ సెలవు ఉంటుంది కాబట్టి, ఆ రోజున కూడా పత్రిక మార్కెట్లోకి పంపడానికి అనుగుణంగా  ముందుగానే ఏర్పాటు చేసుకోవాలి.. రాజకీయ విశ్లేషణలు, సామాజిక, సాహితీ వ్యాసాలు, వినోదం, శాస్త్ర సాంకేతిక కథనాలను ముందుగాను వండి వార్చి ఒక రోజు ముందుగానే ప్రింట్ చేసి మార్కెట్లోకి పంపితే.. నా బోడి సూచన ఎంత మందికి నచ్చుతుందో.. సీనియర్ మీడియా మిత్రులు, పెద్దలకు నా ఆలోచన నచ్చితే షేర్ చేసుకోగలరని ప్రత్యేక మనవి..