ఆయన జీవించింది కేవలం 39 ఏళ్లు మాత్రమే.. కానీ
నాలుగు పదులైనా నిండని జీవితంతో భవిష్యత్తు తరాలకు మార్గదర్శిగా నిలిచారు.. నవ భారత
దేశంలో అత్యధిక దేశ ప్రజలకు, ముఖ్యంగా యువతలో స్పూర్తిని నింపే సందేశాన్ని ఆయన
కొద్ది సంవత్సరాల జీవిత కాలంలోనే ఇచ్చారు.. అత్యంత ప్రాచీన సాంస్కృతిక ఆధ్యాత్మిక వైభవం
ఉన్న భారత దేశం విశ్వగురువు అని ప్రపంచానికి చాటి చెప్పారాయన.. ఆ మహనీయుడే స్వామి
వివేకానంద..
జనవరి 12వ తేదీ స్వామీజీ జన్మదినం.. వారి 150వ
జయంతి ఉత్సవాలను గత ఏడాది ప్రపంచ వ్యాప్తంగా జరుపుకున్నాం.. ఈ శుభ సందర్భంలో వారి
సందేశాన్ని సంక్షిప్తంగా గుర్తు చేసుకుందాం..
‘లేవండి, మేల్కొనండి, గమ్యం చేరే వరకూ
విశ్రమించకండి.. లేవండి! మేల్కొనండి!.. మిమ్మల్ని మీరు మేల్కొల్పుకొని ఇతరులను మేల్కొల్పండి! ఇకపై నిద్రించకండి!.. మీరు మరణించే లోపే జీవిత
పరమావిధిని సాధించండి.. లేవండి!మేల్కొనండి!.. గమ్యం చేరేవరకూ ఎక్కడా నిలవకండి.. ఎప్పటికీ జాగృతంగానే ఉండండి.. బలమే జీవితం, బలహీనతే మరణం.. ఇనుప కండరాలు, ఉక్కు నరాలు, వజ్ర సంకల్ప మనసున్న యువత ఈ దేశానికి
కావాలి..’
‘ఆధునిక యువతపైనే నాకు విశ్వాసం
ఉంది.. నేను నిర్మించిన ఆదర్శాన్ని దేశ మంతా వ్యాప్తి చేసేది యువతే.. యువత ముందు
బలిష్టులు, జవ సంపన్నులు, ఆత్మ
విశ్వాసుల, రుజువర్తనులు కావాలి.. ఇలాంటి వారు వంద మంది
ఉన్నా చాలు, ఈ ప్రపంచాన్నే మార్చేయ వచ్చు..’
‘మీరంతా మహత్కార్యాలు
సాధించడానికే జీవించామని విశ్వసించండి.. బలం, శక్తి మీలోనే
ఉన్నాయని గుర్తుంచుకోండి.. ఎంతో విశ్వాసంతో లేచి నిలబడండి.. ధైర్యంగా బాధ్యతను మీ
భుజ స్కంధాలపై వేసుకోండి.. భవిష్యత్తుకు మీరే బాధ్యులమని తెలుసుకోండి.. ఆరంభం అతి
స్వల్పంగా ఉందని నిరాశపడకండి.. క్రమంగా ఘనమైన ఫలితాలు వస్తాయి.. సాహసంగా పని
చేయండి..’
‘తమ
సర్వస్వాన్ని త్యాగం చేసి, దేశం కోసం తమ జీవితాలను ఆహుతి
చేసే యువత మనకు కొందరు కావాలి.. దేశ ప్రజలను ఉద్దరించే ఏకైక లక్ష్యంతో పని చేసే
యవతను గుర్తించి పని చేయాలి.. త్యాగం, ఉత్సాహాలతో వారిని
జాగృతం చేసి ఐక్యం చేయాలి.. మన స్థితికి మనమే బాధ్యులం.. లక్ష్యాన్ని సాధించే
శక్తి, ఆపై శక్తి మనకే ఉంది..’
‘విజయాన్ని
సాధించడానికి కావలసినవి మూడు. అవి.. పవిత్ర, సహనం, పట్టుదల. వీటన్నింటినీ మించి కావలసింది ప్రేమ.. మీరు నిజంగా నా బిడ్డలే
అయితే దేనికీ భయపడరు.. ఎక్కడా ఆగిపోరు.. మీరు సింహాల్లా ఉండాలి.. మన భారత దేశాన్నే
కాక, ప్రపంచాన్నే జాగృతం చేయాల్సి ఉంది. ఉద్యమ నిర్వహణలో
అవసరమైతే అగ్నిలో దూకడానికైనా సంసిద్ధంగా ఉండాలి..’
భారత
దేశం ఎదుర్కొంటున్న సమస్యలకు పరిష్కారం జాతి పునర్ నిర్మాణమే మార్గమని సూచించారు
స్వామీ వివేకానంద.. ధర్మాన్ని పాటించమన్నారు.. స్వధర్మం తల్లివంటిదని, పర ధర్మం సవతి వంటిదని
అన్నారు.. ఏ విధంగా చూసినా హిందుత్వమే అన్ని ధర్మాలకన్నా గొప్పదని చికాగోలో జరిగిన
ప్రపంచ మతాల సదస్సులో చాటి చెప్పారు వివేకానంద.. ప్రపంచానికి భారత దేశం ఆధ్యాత్మిక
నాయకత్వం వహించాలన్నారు..
నేడు
వ్యక్తిత్వ వికాసానికి సంబంధించిన పుస్తకాలు మర్కెట్లో కుప్పలు తెప్పలుగా
దొరుకుతున్నాయి..కానీ స్థూలంగా పరిశీలించి చూడండి.. ఎందరు ఎన్ని విధాలుగా చెప్పినా
సారాంశం ఒకటే.. కానీ వందేళ్ల క్రితమే వ్యక్తి నిర్మాణం గురుంచి స్వామీజీ చక్కని
బోధనలు చేశారు.. ఆయన బోధనలు చదివితే చాలు, మరే వ్యక్తిత్వ వికాస పుస్తకాలు చదవాల్సిన అవసరం
లేదు.. యువతకు ఆశాజ్యోతి, మార్గదర్శి అయిన స్వామీ వివేకాంద
జయంతిని జాతీయ యువజన దినోత్సవంగా జరుపుకుంటున్నారు..
స్వామీ
వివేకానందను గుర్తు తెచ్చుకుందాం.. ఆయన చూపిన మార్గాన్ని అనుసరిద్దాం.. ఈ దేశాన్ని
పునర్నిర్మిద్దాం..
छत्तीसगढ़िया सबले बढ़िया..
రాయ్‌పూర్‌ శివారులో స్వామి వివేకానంద విమానాశ్రయం వెళ్లే రోడ్డులో స్వాగత ద్వారంపై
కనిపించిన వాక్యం ఇది.. అంటే ఛ‌త్తీస్‌గ‌డ్‌ చాలా ఉత్తమమైనది అని అర్థం.. 
ఛ‌త్తీస్‌గ‌డ్‌
రాజధాని రాయ్‌పూర్‌ వెళతానని ఎప్పుడూ అనుకోలేదు.. మహా అయితే మన దేశంలో ఢిల్లీ,
ముంబై లాంటి మెట్రో నగరాలకో లేదా పర్యాటక ప్రదేశాలకో, పుణ్యక్షేత్రాలకో ఏదో ఒక
సందర్భంలో వెళతాం.. కానీ రాయ్‌పూర్‌ వెళ్లాల్సిన అవసరమే పడకపోవచ్చు.. కానీ ఈ చిన్న
నగరానికి అనుకోకుండా వెళ్లాను.. ఒక విధంగా మంచిదే అయింది.. లేకపోతే ఒక అందమైన
నగరాన్ని చూసే అవకాశం కోల్పోయేవాన్నే.. 
రాయ్‌పూర్‌..
11 లక్షల జనాభా గల ఈ చిన్న నగరం ఎంతో సుందరంగా కనిపించింది. హైదరాబాద్ నగరంతో
పోలిస్తే రాయ్‌పూర్‌ రోడ్లు చాలా నయం అనిపించింది. విశాలమైన రోడ్లకు తోడు ట్రాఫిక్,
కాలుష్యం కూడా చాలా తక్కువ.. తెల్లని చొక్కాలు, టోపీలతో ట్రాఫిక్ కానిస్టేబుల్స్
కౌబాయ్స్ మాదిరిగా కాస్త వింతగా కనిపించారు. తక్కువ వ్యవధి ఉన్నందున రాయ్‌పూర్‌ నగరంలోని
ప్రదేశాలన్నింటినీ పెద్దగా చూడలేకపోయాం.. కానీ నగర్ గడీ క్లాక్ టవర్, షహీద్
స్మారక్ చౌక్, వివేకానంద సరోవర్, మాలవీయ మార్గ్, బిరాన్ బజార్ల మీదుగా కారులో
ప్రయాణించాం.. 
ఛ‌త్తీస్‌గ‌డ్‌
ముఖ్యమంత్రి రమణ్ సింగ్ పరిపాలనా దక్షత చూడాలంటే రాయ్‌పూర్‌ చూస్తే
చాలనిపించింది.. కొత్తగా నిర్మిస్తున్న నయా రాయ్‌పూర్‌ మరో అద్భుతం.. కానీ
సమయాభావం వల్ల సందర్శించలేకపోయాం..
అంతా
బాగానే ఉంది కానీ రాయ్‌పూర్‌ ఆహారం తలచుకుంటేనే భయమేసింది.. పొద్దున్నే కచోరీ,
జిలేబీల అల్పాహారం.. భోజనంలో లావుపాటి జిడ్డు పూరీలు భరించలేక పోయాం.. రాయ్‌పూర్‌
వాసులు పెరుగు, మజ్జిగ అంతగా వాడరనుకుంటాను.. మనకు అవి లేనిదే ముద్ద దిగదాయే.. అక్కడి
ఆహారంలో కారాలు, మసాలాల వాడకం కాస్త తక్కువే.. ఇదీ ఒకందుకు మంచిదే అనిపించింది..
జమ్మూ
కశ్మీర్ అధ్యయన కేంద్రం జాతీయ సదస్సు కోసం ఎన్వీకె ప్రసాద్, రాకా సుధాకర్,
రవిశంకర్, విక్రం సింహా, చౌదరి గార్లతో ఇటీవల రాయ్‌పూర్‌ నగరానికి వెళ్లాను..
నిజంగా ఈ నగర దర్శనం చాలా చక్కని అనుభూతిని ఇచ్చింది.. రాయ్‌పూర్‌ను చూసి
పరవశించిపోయిన మా బృందంలోని ఒక మిత్రుడు ఒక్కడే స్థిరపడి వ్యాపారం
పెట్టేసుకుంటాననేశాడు.. నాకైతే మరోసారి ఈ నగరాన్ని చూసేందుకు వెళ్లాలనిపిస్తోంది..
.jpg)
