మీ పిల్లలకు ఆ సైట్లు చూసే స్వేచ్ఛ ఉందా?

‘ ఇంత అన్యాయమా?.. మోదీ స్వేచ్ఛను హరించేస్తున్నాడు.. ’ అప్పుడే కంప్యూటర్ని షట్ డౌన్ చేస్తూ గదిలోకి వచ్చిన మీడియా మిత్రునితో అన్నాడా నాయకుడు..

‘ ఏం అన్యాయం? ఎవరికి జరిగింది?.. ’ అసక్తిగా ప్రశ్నిండా విలేఖరి తన చిరకాల రాజకీయ మిత్రున్ని..

‘ మరీ తెలీనట్లు అడుగుతావేంటి.. అదే పోర్న్ సైట్ల బ్యాన్ గురుంచే నేను మాట్లాడేది.. ’

‘ నిషేధించొద్దంటారా?.. ‘                                       

‘ ఎందుకు నిషేధించాలి?..’

‘ అలాగా.. అయితే మీరు పోర్న్ సైట్ల నిషేధాన్ని వ్యతిరేకిస్తున్నట్లు రాసుకోమంటారా? ’

‘ఓ నారద మహర్షీ.. నా కొంప కొల్లేరు చేసేట్టున్నావే.. ఇప్పటికే నా సంసారం అంతంత మాత్రంగా సాగుతోంది.. ఈ వార్త మా ఆవిడ చూసిందంటే అన్నం పెట్టడం మాట అట్లా ఉంచి. నన్ను ఇంట్లోకి కూడా రానీయదు.. ’

‘ సరే సరే.. నేనేం రాయనులే.. కానీ మీరు రెగ్యులర్ గా ఆ సైట్లను చూస్తుంటారా?.. ’ ఇంకా షట్ డౌన్ పూర్తి కాని కంప్యూటర్ వైపు ఆసక్తిగా చూస్తూ అడిగాడా మీడియా మిత్రుడు..

‘ ఏం చూస్తే తప్పేంటి?.. నాకు ఆ స్వేచ్ఛ ఉంది..’

‘ ఓహో.. అయితే ఇంట్లో మీ పిల్లలకు కూడా ఆ స్వేచ్ఛ ఇచ్చారా?..’ ఈ ప్రశ్నకు అవాక్కైపోయాడు మన నాయకుడు.

‘ ఓకే మీరు ఇబ్బంది పడ్డారని నాకు అర్థమైంది.. చివరి ప్రశ్న.. మీరు ఆ సైట్లు చూస్తారన్న విషయం మీ ఇంట్లో తెలుసా?...’

పాపం బిత్తరబోయాడు నాయకుడు.

‘ నారద మహర్షీ.. ఈ రోజుకు మీకు టీ కూడా ఇచ్చుకోలేను.. తమరు దయచేస్తారా?.. ’ సవినయంగా గెటవుట్ అని చెప్పాడా నాయకుడు.

‘ సరే నా టీ కూడా మీరే తాగేయండి.. మళ్లీ వస్తా.. ‘ కుర్చీ లోంచి లేచి బయటకు వచ్చేశాడు మన మిత్రుడు..