ప్రపంచ వారసత్వ సంపద హోదా దక్కేనా?

గోల్కొండ కోట మళ్లీ వార్తల్లోకి వచ్చింది.. దాదాపు ఎనిమిది శతాబ్దాల చరిత్ర గల ఈ కోట ఉన్నప్రాంతం సహస్ర కాల చరిత్ర ఉన్నట్లు ఆనవాళ్లు కనిపిస్తాయి..

1143వ సంవత్సరంలో ఓ గొల్లకాపరికి ఈ కొండమీద జగాంబ దేవతా విగ్రహం కనిపిండంతో కాకతీయుల దృష్టిలో పడింది. ఇక్కడో మట్టికోటను నిర్మించారు.. మొదట్లో గొల్లకొండ అని పిలిచేవారు.. క్రమంగా గోల్కొండగా ప్రాచుర్యంలోకి వచ్చింది.. కాకతీయులు, ముసునూరి నాయకుల ఆధీనంలో ఉన్న 1323లో ముస్లిం సుల్తానుల వశమైంది.. ముసునూరి నాయకులు గోల్కొండ కోటను మళ్లీ తమ ఆధీనంలోకి తెచ్చుకున్నారు.. కానీ ఎక్కువ కాలం నిలవలేదు.. 1371లో శాశ్వతంగా హిందూ పాలకులకు దూరమైపోయింది.

1507లో కుతుబ్ షాహీ పాలకుల ఆధీనంలోకి వచ్చిన కోట మట్టి కోట నుండి శత్రు దుర్భేధ్య రాతి కట్టడంగా మారింది.. 5 కిలోమీటర్ల విస్తీర్ణంతో 87 బురుజులు, నాలుగు ప్రధాన సింహ ద్వారాలు, అనేక రాజ మందిరాలతో కోటను విస్తరించారు.. కుతుబ్ షాహీల పాలనలో గోల్కొండ ఒక వెలుగు వెలిగింది.. ఈ కోట కేంద్రంగా గోల్కొండ సామ్రాజ్యం విస్తరించింది.. కాల క్రమంలో కోటలో జనాభా పెరిగి, సరైన సదుపాయాలు లేక వ్యాధులు ప్రభలాయి.. ఈ నేపథ్యంలో కోట వెలుపల మహా నగర నిర్మాణానికి శ్రీకారం చుట్టారు.. 1591లో మహ్మద్ కులీ కుతుబ్ షా మూసీనది ఆవల హైదరాబాద్ నగర నిర్మాణానికి శ్రీకారం చుట్టాడు.. 1687లో మొఘల్ చక్రవర్తి ఔరంగజేబు గోల్కొండ కోటపై దాడికి దిగారు.. అంతటితో ఈ కోట ప్రాభవం అంతరించింది..

కుతుబ్ షాహీల కాలంలో తెలంగాణంలో సహా ప్రస్తుత ఆంధ్రా, రాయలసీమ ప్రాంతాలు దాదాపుగా గోల్కొండ సామ్రాజ్య పరిధిలో ఉండేవి.. తెలుగు భాషా సాంప్రదాయాలు ఒక రూపాన్ని సంతరించుకున్నది ఈ కాలంలోనే.. ప్రపంచ ప్రసిద్ధ కోహినూర్ వజ్రానని గోల్కొండ సామ్రాజ్యంలోనే గనుల్లోనే వెలికి తీశారు.. తానీషా కాలంలో అక్కన్న మాదన్నలు మంత్రులుగా ఉండటం, భక్తరామదాసు కోటలో బందీగా ఉండటం, రామలక్ష్మణులు కప్పకం కట్టి విడిపించడం తెలిసిందే.. దాదాపు వెయ్యేళ్లుగా గోల్కొండ కోటలోని జగదాంబ ఆలయ కేంద్రంగా బోనాలు కొనసాగుతున్నాయి..

నిజాం పాలనపై పోరాటం సాగించిన తెలంగాణ వైతాళికుడు సురవరం ప్రతాప రెడ్డి గోలకొండ పత్రికను స్థాపించడం ద్వారా తెలుగు భాషా సాహిత్యాలకు సేవ చేయడం తెలిసిందే.. తెలంగాణంలో అసలు కవులే లేరు అని ఓ కువిమర్శకుడు చేసి వ్యాఖ్యకు సమాధానంగా కవుల సంచిక తేవడం తెలిసిందే..

గోల్కొండ కోట ప్రపంచంలోని గొప్ప కట్టడాలకు మాత్రం తీసిపోదు.. ఎన్ని సార్లు చూసినా తనివి తీరదు.. దేశ విదేశాల నుండి పర్యాటకులు ఈ కోటను చూసేందుకు వస్తుంటారు.. దురదృష్టవశాత్తు గత పాలకులు గోల్కొండకు ప్రపంచ చారిత్రిక వారసత్వ సంపద గుర్తింపు తేవడంలో విఫలం అయ్యారు.. కొత్తగా ఏర్పడ్డ తెలంగాణ రాష్ట్రంలో తొలి ప్రభుత్వం గోల్కొండ కేంద్రంగా స్వాతంత్ర్య దిన వేడుకలు జరపాలని నిర్ణయించడం స్వాగతించదగినదే.. తెలంగాణ ప్రభుత్వం గోల్కొండ కోటకు ప్రపంచ వారసత్వ సంపద గుర్తింపు తెచ్చే ప్రయత్నం సీరియస్ గా చేయాలని కోరుకుంటున్నాను.. 

యుద్ద స్మారకం దుస్థితి

మీరు ఎప్పుడైనా చాదర్ ఘాట్ వెళ్లితే మూసీ నది ఒడ్డున సాయిబాబా ఆలయం ముందు పిచ్చి మొక్కలతో కంపు కొట్టే దుర్గంధంలో ఉన్న ఓ స్మారక స్థూపాన్ని చూడొచ్చు.. అదేమిటో తెలుసుకోవాలనుకుంటున్నారా?..

ఇటీవలే మొదటి ప్రపంచ యుధ్ధ శత వార్షికోత్సవాలు ప్రారంభమయ్యాయి.. జులై 28, 1914లో ప్రారంభమైన ఈ యుధ్ధం నాలుగేళ్లకు పైగా సాగి 11 నవంబర్ 1918లో ముగిసింది.. మరి దీనితో మనకేమిటి సంబంధం అనుకుంటున్నారా?..

ఆనాటి యుద్ధ రంగంలో హైదరాబాద్ సైన్యానికి చెందిన రెండు రెజిమెంట్లు గ్రేట్ బ్రిటన్ తరపున పాల్గొన్నాయి.. బ్రిటిష్ వారి సామంతుడిగా ఉన్న హైదరాబాద్ పాలకుడు ఏడో నిజాం మీర్ ఉస్మాన్ అలీఖాన్ యుద్ధంలో వారికి ఆర్ధికంగా కూడా అండగా నిలిచాడు.. ఈ సేవలకు ఎంతగానో మెచ్చుకున్న బ్రిటన్ రాజు యుద్ధానంతరం నిజాం ప్రభువు బిరుదును ‘హిజ్ హైనస్’ నుండి ‘హిజ్ హెగ్జాల్టెడ్ హైనస్’ స్థాయికి పెంచాడు.. మొదటి ప్రపంచ యుద్ధంలో హైదరాబాద్ సైనికులు ఎందరో అమరులుయ్యారు.. వారికి నివాళిగా చాదర్ ఘాట్ ప్రాంతంలో War Memorial Monument నిర్మించారు..

అంతటి చారిత్రిక ప్రాధాన్యత గల ఈ స్మారక స్థూపం ప్రస్తుతం మల మూత్రాల కంపులో పిచ్చి మొక్కల మధ్య ధీనంగా కనిపిస్తోంది.. దాని చూట్టూ ఉన్న రెయిలింగ్ పైన స్థానికులు బట్టలు ఆరేస్తారు.. పాపం వారికి దాని ప్రాధాన్యత తెలియదు కదా.. ఈ స్థాపం నిర్మించిన స్థలాన్ని విక్టరీ గ్రౌండ్ అని పెలిచేవారు.. కాల క్రమంలో ప్రభుత్వం అక్కడ చక్కని ప్లే గ్రౌండ్ నిర్మించింది.. (అది మాత్రం శుభ్రంగా ఉంటుంది లెండి)

మొదటి ప్రపంచ యుద్ధ శత వార్షికోత్సవం సందర్భంగా అందులో పాల్గొన్న దేశాలన్ని ఆనాటి గాయాలకు గుర్తు చేసుకొని, యుద్దంలో అమరులైనవారికి నివాళులు అర్పిస్తున్నాయి.. కానీ ఘనత వహించిన తెలంగాణ ప్రభుత్వం, గ్రేటర్ హైదరాబాద్ మున్సిపల్ కార్పోరేషన్ కు ఈ విషయం పట్టినట్లు లేదు.. అందుకే ఈ స్మారక స్థూపాన్ని మరచిపోయాయి.. జర దీని మీద నజర్ పెట్టుండి సార్లూ.. గిది కూడా మన హైదరాబాద్ బ్రాండ్ ఇమేజీకి సంబంధించిన వ్యవహారమే..

ఎన్నాళ్లకెన్నాళ్లకెన్నాళ్లకూ?..

‘దోస్తు మేరా దోస్త్..’ ‘స్నేహమేనా జీవితం..’ ‘ఇద్దరు చంద్రులు కలిశారు..’ అంటూ ఈ దృశ్యానికి మన మీడియా మిత్రులు బాణీలు కట్టేస్తున్నారు.. నిజానికి ఈ సీన్ కోసం రెండు నెలలుగా గోతికాడి నక్కల్లా ఎదురు చూస్తున్నారంటే నమ్మండి.. వెటకారం మరీ ఎక్కువైందని ఎవరైనా మీడియా మిత్రులు నొచ్చుకుంటే అందులో నా తప్పేమీ లేదు.. నిజం నిప్పులాంటి కదా?.. మీరు చూస్తున్న ఈ దృశ్యంలో ఏ మాత్రం నిజాయితీ లేదు.. ఇద్దరివీ తెచ్చి పెట్టుకున్న బలవంతపు నవ్వులే..

రెండు రాష్ట్రాలు.. ఇద్దరు ముఖ్యమంత్రులు.. ఒకే రాజధాని.. ఒకే తడక చాటు సచివాలయం..ఇద్దరి నివాసాలు దగ్గర్లోనే ఉంటాయి.. అంతే కాదు ఇద్దరి క్యాంప్ ఆఫీసులు దగ్గర్లోనే ఉంటాయి.. తెలంగాణ రాష్ట్రం ఏర్పడి అప్పుడే రెండు నెలలు గడచింది.. కానీ ఈ రెండేళ్లలో ఏనాడూ మొహాలు చూసుకోలేదు ఈ మాజీ దోస్తులు..

కలవడానికి ఎన్నో సందర్భాలు వచ్చాయి.. ఒకరి ప్రమాణ స్వీకారానికి మరొకరు హాజరు కాకుండా తప్పించుకు తిరిగారు.. గవర్నర్ సాంప్రదాయంగా ఇచ్చిన ఇఫ్తార్ విందులో తప్పనిసరిగా కలుస్తారుని మీడియా మిత్రులు చకోర పక్షుల్లా ఎదురు చూశారు.. కానీ ఇద్దరిలో ఒక సీఎం మాత్రమే వచ్చాడు.. రెండో ఆయన మొహం చాటేశాడు.. ఏ కార్యక్రమంలోనూ ఎదురుపడకుండా జాగ్రత్త పడ్డారు.. కానీ ఇప్పడు రాష్ట్రపతి హైదరాబాద్ వస్తున్న సందర్భంలో రాజ్యాంగ హోదాలో ఇద్దరూ ఎయిర్ పోర్టుకు వెళ్లి స్వాగతం పలకక తప్పలేదు.. మొత్తానికి ఇలా బుక్కైపోయారు.. ఎన్నాళ్లు తప్పించుకుంటారు.. బలవంతపు నవ్వులతో పలకరించుకొని చేతులు కలిపారు పాపం..

నిజానికి ఇరు రాష్ట్రాల మధ్య సత్సంబంధాల కోసం చంద్రబాబు ఓ మెట్టు దిగి వస్తున్నా కేసీఆర్ ‘యే మేనా జహా.. తెర కామ్ క్యా హై యహా..’ అంటూ మొండిగానే ఉంటున్నారు.. కానీ బాబు గారికి తప్పదు కదా ఎంతైనా అద్దె ఇళ్లు.. కొత్త ఇళ్లు కట్టుకునే దాకైనా ఓనరు గారితో జాగ్రత్తగా ఉండాలి కదా?..

ఇరు తెలుగు రాష్ట్రాల ముఖ్యమంత్రులు ఇలా ఎడ్డం అంటే తెడ్డం అంటూ దోబూచులాడుతుంటే, దెబ్బతినేది తెలుగువారి ప్రయోజనాలే.. భౌగోళికంగా, పాలనా పరంగా విడిపోయామే తప్ప, భాషా సాంస్కృతికంగా ఉన్న సంబంధాలను ఎవరు చెరిపేయగలరు? మనకు సమస్యలు ఎన్నో ఉన్నాయి.. అవి స్థానికత, ఫీజు రీ యంబర్స్ మెంట్, విద్యుత్, నదీ జలాల పంపిణీ తదితరాలతో ముగిసిపోదు.. మున్ముందు ఇంకా ఎన్నో  దృశ్యాలు చూడబోతున్నాం.. ఇవన్నీ పరిష్కారం కావాలంటే ఇలాంటి దోబూచులాటలు పనికి రావు.. మీ కోసం కాకపోయినా ప్రజల కోసమైనా ఈ బలవంతపు నవ్వులు పులుముకొని అయినా తరచూ కలుసుకోండి.. కరచాలనాలు చేసుకోండి అవసరమైతే వాటేసుకోండి..

జై తెలంగాణ.. జై ఆంధ్రప్రదేశ్.. జై హింద్..

రెండుగ వెలుగు జాతి మనది..

తెలంగాణ గడ్డలో పుట్టి, తెలుగు సాహితీ మాగాణిలో బంగారు పంటలు పండించిన ఆధునికాంధ్ర కవి, సినీ రవి.. సింగిరెడ్డి నారాయణ రెడ్డి.. జ్ఞానపీఠ్ తో సహా  పురస్కారాలు అందుకున్న సినారె కొన్ని వేల గీతాలు రాశారు.. ఆయన కావ్యాలు, రచనలు ఎంతో ప్రసిద్ది పొందాయి.. తెలుగు భాషకు, సాహిత్యానికి అవిశ్రాంతంగా ఎంతో సేవ చేస్తున్న సినారె 84వ జన్మదినం జరుపుకున్న సందర్భంగా శుభాకాంక్షలు..

సినారెకు తెలంగాణ అంటే ఎంతో అభిమానం.. తెలంగాణ రాష్ట్రం ఏర్పడాలని బలంగా కోరుకున్నారు.. అయినా తొలి తెలంగాణ ఉద్యమ (1969)లో ఎన్టీఆర్ సినిమాలో ‘తెలుగు జాతి మనది..’ అనే పాట రాశారు.. దానిపై ఈనాటికీ విమర్శలు ఉన్నాయి.. అయితే ఈ విమర్శలకు ఆ పాటలోనే సమాధానం ఉందనే విషయం చాలా మంది గ్రహించలేదు.. ‘రెండుగ’ వెలుగు జాతి మనది.. అంటూ ఆ పాట రెండోలైనులో రాశారు.. ఇటీవల సాక్షిలో వచ్చిన సినారె ఇంటర్వ్యూలో ఈ ఆసక్తికరమైన అంశాన్ని గమనించండి..

ఇదేం సవరణ..

వెనకటికి ఒకడు 'కాకరకాయ' అనరా అంటే.. 'కీకరకాయ' అన్నాడని నానుడి..తెలంగాణ రాజముద్ర వ్యవహారం అలాగే ఉంది..
తెలంగాణ రాజముద్రపై ఆది నుండి వివాదాలే..
రాజముద్రలో నాలుగు సింహాల కింద ఉండే 'సత్యమేవ జయతే' అనే దేవనాగరి లిపి అక్షరాల విషయంలో వ్యక్తమైన అభ్యంతరాలు న్యాయస్థానం మెట్లు దాటాయి.. దీంతో ప్రభుత్వం లోగో కింద ఉండే 'సత్యమేవ జయతే'ను రాజముద్ర కింది నుండి తీసి నాలుగు సింహాల కింద చేర్చింది.. ఇప్పడు వ్యవహారం అశ్వథామ హత: (కుంజర) అన్నట్లైంది.. గతంలో సత్యమే జయతే కొట్టొచ్చినట్లు కనిపించేది.. ఇప్పడు బూతద్దం పెట్టి చూసినా కొత్త రాజముద్రలో సత్యమేవజయతే కనిపించకుండా పోయింది..
పాత రాజముద్రలో కాకతీయ శిలాతోరణం అను ఫాంట్ క్లిప్ ఆర్ట్ నుండి సంగ్రహించారనే అపవాదు ఉండేది.. దాన్ని సవరించారు సంతోషం.. అలాగే మూడు మీనార్ల చార్మినార్ నాలుగు మీనార్లకు చేరింది..కానీ మిగతా అభ్యంతరాల సంగతి ఏమిటి? ఆ విషయాలను ఎందుకు పరిశీలించలేదు?..
తెలంగాణ సంస్కృతికి ప్రతి రూపాలైన బతుకమ్మ, బోనం, పూర్ణకుంభంలతో ఏదైనా ఒకటి రాజముద్రలో చేరితే ఎంత హుందాగా ఉండేది.. నాకు తెలిసి సత్యమేవ జయతే వివాదం మళ్లీ కోర్డు దృష్టికి వెళుతుంది.. ఈలోగా ప్రభుత్వం ప్రజల మనోభావాలను దృష్టిలో పెట్టుకొని రాజముద్రను సవరిస్తే బాగుంటుంది..

ఈ ఆదర్శ తల్లిదండ్రుల్లో ఆంధ్ర ప్రదేశ్, తెలంగాణా సిఎమ్ లు లేరా శ్రీధర్ గారూ..

తెలంగాణను రక్షించుకుందాం..

నిన్న, మొన్నటి దాకా కశ్మీర్ హిందుస్తాన్ కా.. నహీ కిసీకా బాప్ కా.. అంటూ దేశ ప్రజలు నినాదాలు చేసేవారు.. ఇప్పుడు తెలంగాణ విషయంలో కూడా అలాంటి నినాదాలు చేస్తే దుస్థితి రానుందా?.. మోకాలికి, బట్ట తలకు ముడి పెట్టినట్లు కొందరు మహానుభావులు కాశ్మీర్, తెలంగాణ సమస్యలు కలిపేసి వాదిస్తున్నారు.. అసలు వీరికి భారత దేశ చరిత్ర తెలుసా? ఈ దేశ ప్రజల మనోభావాలు అర్థం చేసుకున్నారా?

1947కి పూర్వం జమ్మూ కాశ్మీర్, తెలంగాణ భారత దేశంలో భాగం కాదట.. ఈ రెండు ప్రాంతాల భూ చట్టాలు ఒకేలా ఉన్నాయట.. స్థానికేతరులు భూములు కొనడం నిషేధమట.. ఎందుకీ వక్రీకరణ? ఎవరి చెవిలో పూలు పెట్టాలనుకున్నారు?

తెలంగాణ ప్రాంతం హైదరాబాద్ స్టేట్లోని మూడు ప్రధాన భూభాగాల్లో ఒక భాగం.. దానికి ప్రత్యేక భూచట్టం ఉన్నట్లు చరిత్రలో ఎక్కడా లేదు.. నిజాం నవాబు నిరంకుశ పాలన, రజాకార్ల దురాగతాలకు వ్యతిరేకంగా ఇక్కడి ప్రజలు పోరాడారు.. హైదరాబాద్ స్వతంత్ర దేశంగా ఉంటుందని, అవసరమైతే పాకిస్తాన్లో చేరతామని ఏడో నిజాం మీర్ ఉస్మాన్ అలీఖాన్ బెదిరించాడు.. కానీ హైదరాబాద్ రాష్ట్ర ప్రజలంతా భారత దేశంలో కలవాలని కోరుకున్నారు.. స్టేట్ కాంగ్రెస్ , ఆర్యసమాజం, కమ్యూనిస్ట్ పార్టీలు నిజాం పాలనకు వ్యతిరేకంగా తమ తమ మార్గాల్లో పోరాడాయి.. చివరకు భారత హోంమంత్రి సర్దార్ వల్లభాయ్ పటేల్ నిర్వహించిన పోలీస్ యాక్షన్ తో భారత్ లో హైదరాబాద్ విలీనం సంపూర్ణంగా జరిగింది.. నిజాం నవాబు సైతం హుందాగా అంగీకరించి రాజ్ ప్రముఖ్ (గవర్నర్) పదవి స్వీకరించారు.. ఇదీ చరిత్ర..

ఇక తెలంగాణకి ప్రత్యేక భూచట్టం ఎక్కడి నుండి వచ్చినట్లు? ఇప్పటికే ఆర్టికల్ 370 పుణ్యమా అని జమ్మూ కాశ్మీర్ రావణ కాష్టంలా రగులుతోంది.. ఆ రాష్ట్రంలో ఇతరులు భూములు కొనడం నిషేధం.. కాశ్మీరీలు దేశ ప్రజలతో మమేకం కాకుండా మరికొన్ని క్రూర నిబంధనలు ఆర్టికల్ 370 కారణంగా అడ్డు పడుతున్నాయి.. చూడబోతే తెలంగాణకు కూడా ఇలాంటి ఆర్టికల్ కోసం వీరు డిమాండ్ చేయబోతున్నారా అనే అనుమానాలు ఏర్పడుతున్నాయి..

పాకిస్తాన్ ప్రేరిత వేర్పాటువాద శక్తుల కారణంగా ఇప్పటికే కాశ్మీర్ రావణ కాష్టంలా రగులుతూనే ఉంది.. ఈ జాబితాలో తెలంగాణను చేర్చాలనుకుంటున్నారా?

తెలంగాణ ఎక్కడి నుండో ఊడిపడలేదు.. ఈ దేశంలో సంపూర్ణమైన అంతర్భాగమిది.. ముందు మనం భారతీయులం.. ఆ తర్వాతే తెలంగాణ వాసులం.. మన తెలంగాణను రక్షించుకుందాం..